ماں کا خواب

میں سوئی جو اِک شب تو دیکھا یہ خواب
بڑھا اور جس سے مِرا اِضطراب

یہ دیکھا، کہ میں جا رہی ہوں کہیں
اندھیرا ہے اور راہ مِلتی نہیں

لرزتا تھا ڈر سے مِرا بال بال
قدم کا تھا دہشت سے اُٹھنا محال

جو کچھ حوصلہ پا کے آگے بڑھی
تو دیکھا قطار ایک لڑکوں کی تھی

زمرد سی پوشاک پہنے ہوئے
دِیے سب کے ہاتھوں میں جلتے ہوئے

وہ چپ چاپ تھے آگے پیچھے رَواں
خُدا جانے، جانا تھا اُن کو کہاں

اِسی سوچ میں تھی کہ، میرا پسر
مجھے اُس جماعت میں آیا نظر

وہ پیچھے تھا اور تیز چلتا نہ تھا
دِیا اُس کے ہاتھوں میں جلتا نہ تھا

کہا میں نے پہچان کر ، میری جاں!
مجھے چھوڑ کر آ گئے تم کہاں

جُدائی میں رہتی ہُوں میں بے قرار
پروتی ہوں ہر روز اشکوں کے ہار

نہ پروا ہماری ذرا تم نے کی
گئے چھوڑ ، اچھی وفا تم نے کی

جو بچے نے دیکھا مِرا پیچ و تاب
دِیا اُس نے منہ پھیر کر یُوں جواب

رُلاتی ہے تُجھ کو جُدائی مِری
نہیں اِس میں کچُھ بھی بَھلائی مِری

یہ کہہ کر وہ کچُھ دیر تک چپ رہا
دِیا پھر دِکھا کر یہ کہنے لگا

سمجھتی ہے تُو، ہو گیا کیا اِسے؟
تِرے آنسوؤں نے بُجھایا اِسے

Main Soi Jo ik Shub To Dekha Ye Khaawab,
Barha Aur Jis Say Mera Iztaraab,

Ye Dekha K Main Ja Rahi Hun Kahin,
Andheraa He Aur Rah Milti Nahin,

Laraztaa Tha Dar Say Mera Baal Baal,
Qadam Ka Tha Dehshat Say Uthnaa Mahaal

Jo Kuch Hoslaa Pa Kay Aagay Berhi,
To Dekha Qitaar Aik Larkon Ki Thi,

Zumurad C Poshaak Pehne Huye,
Diye Sab Ke Hathon Main Jalte Huye,

Woh Chup Chaap Thay Agay Peeche Rawaan,
Khudaa Jane Janaa Tha Un Ko Kahan,

Iss Soch Main Thi Kay Mera Pisar,
Mujhe Uss Jamaat Main Aya Nazar,

Woh Peeche Tha Aur Taiz Chalta Na Tha,
Diya Uss Kay Hathon Main Jalta Na Tha,

Kaha Main Ne Pehchaan Ker, Meri Jaan!
Mujhe Chor Kar Aa Gaye Tum Kahan?

Juddai Main Rehti Hun Mein Be-Qaraar,
Paroti Hun Her Roz Ashkoon Ke Haaar,

Na Parwa Hamari Zara Tum Nay Ki
Gaye Chor, Achi Wafaa Tum Ne Ki!

Jo Bachay Ne Dekha Mera Peech-O-Taaab,
Diya Uss Nay Munh Phair Kar Yun Jawaab,

Rulati He Tujh Ko Juddaai Meri,
Nahin Uss Main Kuch Bhi Bhalaai Meri,

Ye Keh Kar Vo Kuch Dair Tak Chup Rahaa,
Diya Phir Dikhaa Ker Ye Kehne Laga,

Samajhti He Tu Ho Giyaa Kya Issay?
Tere Aanasuon Ne Bhujayaa Issay!